"ഭഗവത് കൃപ"

"ഭഗവത് കൃപ"

(9.4.2008)

ഭഗവാന്‍റെ കൃപയാകും 

മഴയില്‍നിന്നൊരുതുള്ളി 

മതിയല്ലോ, മനതാരില്‍ 

വിത്തൊന്നു മുളയ്ക്കാനായ്.

ഭഗവാന്‍റെ കൃപയാകും 

വെയിലിന്‍റെയൊരു രശ്മി 

മതിയല്ലോ, മനതാരില്‍ 

പൂമൊട്ടുവിരിയാനായ്.

ഭഗവാന്‍റെ കൃപയാകും 

നിലാവിന്‍റെയൊരുവെട്ടം

മതിയല്ലോ, മനതാരില്‍ 

വിളവെല്ലാം വിളയാനായ്.

ഭഗവാന്‍റെ കൃപയാകും 

സത്സംഗത്തിനിടയായാല്‍ 

മതിയല്ലോ, മനതാരില്‍ 

തിരുനാമം ഉണരാനായ്.

ഭഗവാന്‍റെ കൃപയാകും 

അറിവിന്‍റെ ശകലങ്ങള്‍ 

മതിയല്ലോ, നാമജപം 

അവിരാമം തുടരാനായ്.

ഭഗവാന്‍റെ കൃപയാകും 

ഗുരുനാഥന്‍ കനിഞ്ഞെന്നാല്‍ 

മതിയല്ലോ, നാമെല്ലാം 

ജഗദീശനിലലിയാനായ്.

"കണ്ണിന്നു കണ്ണനാം കണ്ണനെങ്ങും നിറഞ്ഞൂ"

"കണ്ണിന്നു കണ്ണനാം കണ്ണനെങ്ങും നിറഞ്ഞൂ" 

(27.12.13)

ഇല്ലത്തുപോയപ്പോൾ 

ഊഞ്ഞാലുകണ്ടൂ. 

ഊയലാടുമ്പോൾ 

കണ്ണൊന്നടച്ചൂ.

കണ്ണടച്ചീടുമ്പോൾ 

പാട്ടൊന്നുമൂളി. 

കീർത്തനം മൂളുമ്പോൾ 

ചിന്തകൾ മാഞ്ഞൂ.

ചിന്തകൾ പോയപ്പോൾ 

കണ്ണൻ വരുന്നൂ.

കണ്ണനെ കണ്ടപ്പോൾ 

ഞാനും മറഞ്ഞൂ.

ഞാനെങ്ങോ മാഞ്ഞപ്പോൾ 

കണ്ണൻ നിറഞ്ഞൂ.

അമ്മ

അമ്മ

(25.6.14)

നരജീവിതത്തിലറിയാതെയെങ്കിലും

തെറ്റുകൾ വന്നിടും പലപ്പോഴും.

പുനരാതെറ്റുകൾ അവനൊരിക്കലും 

ആവർത്തിക്കാതിരിക്കുകിൽ, എന്നും-

പുണർന്നീടുമമ്മ, കനിഞ്ഞീടുമെന്നും 

ആർത്തൻ തൻ പ്രാർത്ഥന ഒരിക്കലും 

പേർത്തും വൃഥാവിലാവില്ലെന്നറിയണം 

"വിഷു വരവായി"

"വിഷു വരവായി"

(12.4.2013)

കൊന്നപ്പൂവൊരുങ്ങിനിന്നു 

അന്നഫലവർഗ്ഗങ്ങൾ നിരന്നു
കണിയൊരുക്കി ഞാൻ കിടന്നു 

കണികാണാൻ കാത്തുകിടന്നു. 

പുലരും മുൻപുണർന്നു 

വിളക്കും കൊളുത്തിയിരുന്നു 

വിളിച്ചുണർത്തി മാറിനിന്നു 

വീട്ടിലെല്ലാവരുമുണർന്നു. 

കണികണ്ടു കണ്‍കുളിർന്നു 

കൈനീട്ടം വാങ്ങിനിന്നു
കണ്ണനെന്നും കണ്ണിലെന്നും 

കരളിലെന്നും കടന്നിരുന്നു! 

മുരളീധാരി

മുരളീധാരി

(16.2.14)

മയിലും മയിൽപീലികളും 
മുകിലും മുകിൽമാലകളും 
മലയും മലനിരകളും 
നീലയും നീലക്കാർവർണ്ണനും 
മനമിതിൽ ഓടിയണയുന്നേൻ 
മനമോഹന ഓടക്കുഴൽധാരിയും.